中文閱讀理解，係所有考生的噩夢。唔鞏固語文根底，係咪只可以束手待斃？
當然唔係！
閱讀理解再難，都終究係考試，只要係考試，就必定有公式同套路。只要依循步驟作答，分數就可以手到拿來！
今日呢篇文章，就會教吓大家，接到文章，究竟要做啲乜？
DSE中文卷一策略
參照往年卷一嘅表現，就會發現閱讀理解其實唔要求同學攞高分，年年嘅評均得分百分比，都只係40-45%。即係話，同學只要答啱一半題目，已經足經攞4。如果攞到60%，好彩嘅甚至有5*。正因為噉，心態上，同學唔應該好似其他科目噉，以滿分為目標。所以卷一嘅答案，只求穩陣不求完美，有答有分就夠。
表︰2020 DSE 中文閱讀理解 分題表現 及 得分百份比
答題步驟
步驟一︰留意文章標題
好多同學一收到份卷，名都唔寫label都唔貼，就會開始睇卷，噉做係非常之浪費自己時間。茫無頭緒去睇卷，猶如空手入白刃，除非係武林高手，否則下場往往係︰兵器搶唔到，再自斷雙手。相反要做嘅，係對文章有初步理解，大概知道作者討論緊乜嘢，知道文章主題，噉就唔會喺文章之中被作者老點。
所以，第一步係，睇文章標題先。
而標題，普遍嚟講有兩個功能。第一係作為文章線索，話畀讀者聽，作品係會討論乜嘢，以乜嘢為敘事線索。舉個例子，以下嘅呢堆電影，就算未睇過，你都會多少對故事有理解︰
林肯、火星任務、秋遊日本、鄧寇克大行動、一九一七、沙丘、鐵達尼號
作品題目已經講咗故事同乜嘢有關。
標題嘅另一功能，係盛載哲理，開宗明義話畀讀者聽，作者終極立意係啲乜，又例如以下呢啲名字︰
寫出友共鳴、愛的方程式、擊情手足、可憐的東西、觸不到的她、鼓動真我、壯志奔騰
同第一類唔同，我哋唔知佢個故事係乜，但我哋會知佢想傳達乜嘢價值，或者有咩感覺。寫出友共嗚，一定係講友愛；愛的方程式，一定係講愛能戰勝一切；擊情手足、鼓動真我、壯志奔騰，應該都係熱血勵志青春故事。
而好嘅標題，更會將兩樣功能合而為一，例如歷年DSE閱讀卷嘅文章︰
橋、目送、紅心蕃薯、我交給你們一個孩子、第九味、夢中的父親、繁盛
好似「紅心蕃薯」，既係全文敘事線索同客體（成篇文都係講蕃薯嘅種種），同時紅心蕃薯本身，都象徵住對鄉土嘅思念，象徵住喺艱難環境之下努力生活。文學觸覺敏銳，或者訓練較多嘅同學，其實睇標題，就大概get到作者想開邊辮。
步驟二︰略讀試卷問題
睇完標題，都唔使心急睇文住。第二步係略讀咗問題先，目的都一樣，先大概掌握文章內容先。問問題嘅時候，我哋係唔可以抽離被討論嘅對象。例如我計劃緊今晚食乜，我可能會噉問︰
今晚食咩好？
呢條問題，透露咗時間，你知我諗緊今晚食乜。又如果我噉問︰
日本定越南？
你未必知我諗緊食乜，但你知道我面對緊選擇，而呢個選擇同國家有關，可能係網購緊，可能係諗去邊喥旅行，或者我粒核彈想炸邊喥。無論如何，都係訊息。
呢個就係要先睇問題嘅原因，問題其實透露咗好多文本訊息。
我哋再睇實際例子，二零二四年〈繁盛〉。（由於使用引文嘅話，Google會認為呢篇文原創內容少，然後唔將篇文放上Search Result Page，所以唔直接quote了，各位自己撳入去睇。下同。）
剩係問題，就概括咗文章大量內容，甚至標示咗關鍵字眼（繁盛）同象徵物件（手電筒）。就算未睇文章，讀者都應該知呢個係開墾嘅故事，講農人去到異地生活，期間改變環境改變自然，而其中人物要同自然對抗，努力生存。文章主題就係枯萎同繁衍。
質疑問題有無咁大功能嘅同學，可以自己睇睇歷年嘅問題，然後你會理解我，再嚟係認同我，加入我。
步驟三︰從尾段看起
終於可以睇文喇！但唔係叫你由頭到尾一字不漏噉睇，而係反其道而行，由尾段睇起。作過文嘅同學都會記得，高分嘅文章一定要「昇華」，而昇華，通常都喺尾段。大作家嘅文章一樣，如同張愛玲所講，寫作就係跳肚皮舞，文人想俾你睇肚皮，但又唔好意思咁直接，於是熠熠洋洋，但講到底佢哋又講你睇唔到，最後都係會show出嚟。寫完幾千字嘅文，如果讀者最後唔明，就實在太掃興了。所以大部分作家，喺最後一段，都一定會「畫公仔畫出腸」，講大道理，講佢覺得個世界要點點點點。
又睇吓例子。二零二三，一竿冷︰
二零二三，我們去唱歌︰
二零二零，夢中的父親︰
文章最後部份，已經點出晒題旨，一竿冷係講生死調和，我們去唱歌係講在無奈中不可喪失意志勇氣，而夢中的父親係話阿爸好掛住阿媽。全部，都寫喺文章最後嘅部分。做卷嘅時候，學識睇咗先，噉再由頭睇篇文，就會知有咩要睇，又有啲咩唔使睇。
步驟四︰從頭看起
當尾段睇到咁上下，大概係搵到關鍵字同主題，就可以停止。然後，由頭睇到尾。但呢個時候，我哋已經喺文章標題、試卷問題同最後幾段掌握到文章線索同母題，所以係唔需要一字一句噉去睇——只要睇同主題相關嘅描述就足夠。而其他，特別係太詳盡嘅風景人物描寫，都可以唔使理住，除非做卷時真係問到，先認真少少去睇。
以下係例子，我們去唱歌，有啲咩段落係多餘唔使睇︰
二零二三年，我們去唱歌。上文係第二段，用咗極多篇幅去講村莊嘅風景，而我睇嘅時候，只係睇到「我們沿著村中唯一的一條直路走」，就飛咗去下一段了。呢啲段落，睇完會唔記得，除非問到，否則睇嚟無為。
睇嚟時候，只要留意事件、情節、時地、對話、感情同哲思就足夠，其他都係可以飛咗先。一段一段睇落去，直到最後一段，你大概就會明白，最後一段想講乜，而前面部分嘅存在意義。
題型攻略
分段方法
籠統嚟講，文章可以分為記敘文同說明文，兩類文章嘅分段方法會有少少差別。
記敘文嘅話︰
- 首先要留意時間同空間嘅轉換，呢個係最直觀嘅分段方法。「又過了很多很多年」、「記得第一年」、「整個冬天」、「婚後，你和丈夫回家」、「我喜歡在日夕尚未謝幕前出發去慢跑」、凡此種種、時間嘅變換同時都係文章唔同部份嘅轉換。
- 其次可以留意事件，例如第九味「據父親回憶，那回羅中將嫁女兒」同「學校畢業後，我被分發至澎湖當裝甲兵」，事件其實都多多少少包含時空轉變，只係有時未必會咁直接。
- 但以上都只係參考，唔敢話跟住就一定啱，因為段落嘅真正分野，係在於中心思想嘅唔同。「那逝去的像流水，像雲煙，多少繁華的盛宴聚了又散散了又聚，多少人事在其中，而沒有一樣是留得住的。」呢段無講到時間空間，但傳遞緊「人來人往，緣來緣去」嘅感情，同前文純粹交代事件唔同，已經係更高深嘅層次。
至於說明文，又相對簡單啲︰
- 最直接係睇連接詞，如〈一個人和三個人稱〉嘅「與此相類似」同「先說第三人稱」，單刀直入講咗佢會就住某事某物展開議論。
- 深層次少少，就係睇問題睇例子，其實每一篇說明文，都係要回應大大小小嘅問題。聰明有心思嘅作者，會諗到用唔同方法過場，但有時文章真係太多，諗過場諗到爆頭——就索性唔諗，直接將問題寫出，自問自答，慳力水慳工夫。例如〈說誓〉當中「那麼，身為凡人的我們該發誓嗎？」同「以今日之我否定昨日之我，回頭見時間上游的我指著時間下游的我大罵，如何是好？」，多留意文章嘅問句，會比較容易睇到思想嘅跳接。
- 而最正確嘅，係要睇段落有無咩建議哲思，因為每篇說明文，都作者教化世人嘅演說，作者覺得世界需要被改變，改變需要佢嘅聲音，所以佢就當仁不讓去話畀愚昧嘅世人聽，你哋應該點做點做。如周國平〈一個人和三個人稱〉︰「為了使內在自我能夠健康生長，你必須給它以充足的營養。如果你經常讀好書、沉思、欣賞藝術等等，擁有豐富的精神生活，你就一定會感覺到，在你身上確實還有一個更高的自我。」，見到作者忍唔住，明刀明槍講道理，文章就一定轉入結尾。
以後繼續。
睇字覺得攰嘅，可以聽吓示範。我哋用二零二四年嘅〈繁盛〉做例子，示範咗以上流程︰
除此以外，我哋重有閱讀理解常規課程，一步步，帶你由唔識睇到識！